खानापूर लाईव्ह न्युज /प्रतिनिधी: निडगल: (ता खानापूर) येथील कै आनंदीबाई तोपिनकट्टी यांच्या स्मरणार्थ त्याचे चिरंजीव प्रा. भरत तोपिनकट्टी यांच्या कडून मराठी हायर प्राथमिक शाळा, निडगल येथे वार्षिक शैक्षणिक स्पर्धा पारितोषिक समारंभ शुक्रवार 26 जानेवारी 2024 रोजी पार पडला. शालेय विध्यार्थ्यांचा शैक्षणिक व बौद्धिक विकास व्हावा यासाठी वर्षभर पाहिली ते सातवी च्या प्रत्येक वर्गासाठी प्रत्येक शनिवारी वाचन, गायन, भाषण, चित्रकला, कागदी वस्तू निर्माण, माती हस्तकला, भाषण, हस्ताक्षर आदी स्पर्धा आयोजिल्या जातात. वर्षभर चांगली हजेरी व स्वच्छ राहण्याची सुद्धा स्पर्धा आयोजिली जाते. या सर्व स्पर्धाची बक्षीसे प्रा. भरत तोपिनकट्टी आपल्या मातोश्री कै. आनंदीबाई यांच्या स्मरणार्थ दरवर्षी प्रायोजित करतात. दरवर्षी प्रमाणे यावर्षीसुद्धा लिहिण्यासाठी पॅड, वह्या, पेन्सिल बॉक्स, स्केच पेन बॉक्स, फाईल फोल्डर, पाण्याची बॉटल, रंग पेटी व इतर शालोपयोगी वस्तू रुपात एकूण 166 पारितोषिकांचे मान्यवरांच्या हस्ते वितरण करण्यात आले.
या वेळी शाळेचे मुख्याध्यापक दशरथ कुंभार यांनी उपस्थितांचे स्वागत केले. शाळा सुधारणा समितीचे अध्यक्ष श्री लोहार हे अध्यक्ष स्थानी होते. या वेळी ग्रामपंचायत सदस्य श्री प्रवीण पाटील, यल्लाप्पा कदम, दिगंबर देसाई, जयदेव देसाई, मल्लापा पाटील, सौ. रेश्मा कदम आणि इतर उपस्थित होते. शाळेतील शिक्षका श्रीमती गुरव यांनी सूत्रसंचालन केले.श्री खांबले यांनी आभार मानले.
