माणसाने बैलगाडा ओढण्याच्या स्पर्धेत ताराराणीच्या शिपायाची दमदार कामगिरी!

माणसाने बैलगाडा ओढण्याच्या स्पर्धेत ताराराणीच्या शिपायाची दमदार कामगिरी!

बेकवाडच्या मैदानात २० स्पर्धकांना मागे टाकत सातेरी पाटील यांना द्वितीय क्रमांक

खानापूर : खानापूर तालुक्यातील बेकवाड येथे आयोजित करण्यात आलेल्या अनोख्या माणसाने बैलगाडा ओढण्याच्या स्पर्धेत मराठा मंडळ संचलित ताराराणी पदवीपूर्व महाविद्यालयाचे शिपाई श्री. सातेरी यल्लाप्पा पाटील यांनी उल्लेखनीय कामगिरी केली. अवघ्या एका मिनिटात ८०५ फूट ६ इंच अंतर पार करीत त्यांनी तब्बल २० स्पर्धकांना मागे टाकत द्वितीय क्रमांक पटकावला.

दिवाळीच्या निमित्ताने बेकवाड येथे या अनोख्या ताकदीच्या स्पर्धेचे आयोजन करण्यात आले होते. खानापूर तालुक्यातील अनेक नामांकित स्पर्धकांनी यात सहभाग घेतला होता. आकर्षक चषक आणि रोख पारितोषिकांसाठी झालेल्या या चुरशीच्या स्पर्धेत सातेरी पाटील यांनी आपल्या शारीरिक ताकदीच्या जोरावर सर्वांचे लक्ष वेधून घेतले.

मराठा मंडळाच्या अध्यक्षा डॉ. राजश्रीताई नागराजू यांच्या मार्गदर्शनाखाली संस्थेत विद्यार्थी तसेच कर्मचारी यांच्या सर्वांगीण विकासाला प्राधान्य दिले जाते. याच प्रेरणेतून सातेरी पाटील यांनी क्रीडा क्षेत्रात सहभाग घेत ही उल्लेखनीय कामगिरी केली.

महाविद्यालयीन कामकाजात प्रामाणिकपणे जबाबदारी पार पाडतानाच क्रीडा क्षेत्रातही त्यांनी आपली क्षमता सिद्ध केली आहे. वय किंवा पद यापेक्षा जिद्द, मेहनत आणि शारीरिक तंदुरुस्ती महत्त्वाची असते, हे त्यांच्या कामगिरीतून दिसून आले.

या यशाबद्दल मराठा मंडळाचे संचालक श्री. शिवाजी पाटील, प्राचार्य अरविंद पाटील यांनी मुख्याध्यापक श्री. राहुल जाधव, प्राध्यापकवर्ग आणि विद्यार्थिनींच्या उपस्थितीत सातेरी यल्लाप्पा पाटील यांचा सत्कार करून अभिनंदन केले.

सातेरी पाटील यांच्या या कामगिरीमुळे ताराराणी पदवीपूर्व महाविद्यालयाच्या क्रीडा क्षेत्रातील यशात आणखी एका मानाच्या तुऱ्याची भर पडली आहे.