चापगाव येथील मलप्रभा हायस्कूलमध्ये बालक-पालक-शिक्षक मेळावा उत्साहात

पालकांनी विद्यार्थ्यांच्या भविष्याचा विचार करावा!

चापगाव येथील मलप्रभा हायस्कूलमध्ये बालक-पालक-शिक्षक मेळावा उत्साहात

चापगाव / प्रतिनिधी : विद्यार्थ्यांचे उज्ज्वल भविष्य घडविण्यात पालक आणि शिक्षकांची भूमिका अत्यंत महत्त्वाची आहे. विद्यार्थ्यांच्या शैक्षणिक प्रगतीकडे पालकांनी गांभीर्याने लक्ष देऊन त्यांच्या आवडीनिवडी, कलागुण आणि क्षमतांचा विचार करावा. मुलांवर अभ्यासाचा अनावश्यक दबाव न आणता त्यांना योग्य मार्गदर्शन व प्रोत्साहन द्यावे, असे आवाहन पत्रकार तथा शाळा विकास व व्यवस्थापन समितीचे (SDMC) अध्यक्ष पिराजी कुऱ्हाडे यांनी केले.

चापगाव येथील दक्षिण महाराष्ट्र शिक्षण मंडळ संचलित मलप्रभा हायस्कूलमध्ये मंगळवार, दि. २७ ऑक्टोबर २०२६ रोजी आयोजित बालक-पालक-शिक्षक मेळाव्यात प्रमुख वक्ते म्हणून ते बोलत होते. यावेळी त्यांनी विद्यार्थ्यांच्या सर्वांगीण विकासासाठी पालक, शिक्षक आणि विद्यार्थी यांच्यात समन्वय असणे आवश्यक असल्याचे सांगितले.

कार्यक्रमाच्या अध्यक्षस्थानी शाळेचे ज्येष्ठ सदस्य विजय धर्माजी कडबी होते. प्रमुख पाहुणे म्हणून SDMC उपाध्यक्ष रमेश धबाले, पालक मष्णू चोपडे, ज्येष्ठ सदस्य पांडुरंग पाटील, नारायण जांबोटकर-देसाई आणि तुकाराम आंबाजी पंच उपस्थित होते.

कार्यक्रमाच्या प्रारंभी मुख्याध्यापक पी. बी. पाटील यांनी प्रास्ताविक करून उपस्थितांचे स्वागत केले. यावेळी विद्यार्थ्यांच्या शैक्षणिक प्रगतीबरोबरच त्यांच्यातील सुप्त कलागुणांना वाव देण्याची गरज अधोरेखित करण्यात आली. पालकांनी मुलांच्या अभ्यासाचा नियमित आढावा घ्यावा, शिक्षकांशी संवाद साधावा आणि त्यांच्या अडचणी समजून घेऊन योग्य मार्गदर्शन करावे, असे मत व्यक्त करण्यात आले.

कार्यक्रमाचे सूत्रसंचालन शिक्षक नंद्याळकर यांनी केले, तर आभार प्रदर्शन शिक्षक केसरकर यांनी केले. कार्यक्रमाच्या यशस्वितेसाठी मुख्याध्यापक, शिक्षकवृंद आणि शाळा विकास व व्यवस्थापन समितीच्या सदस्यांनी परिश्रम घेतले.

२९ ऑक्टोबर रोजी चित्रकला व हस्तकला स्पर्धेचे आयोजन

दरम्यान, दक्षिण महाराष्ट्र शिक्षण मंडळांतर्गत येणाऱ्या माध्यमिक शाळांमधील विद्यार्थ्यांसाठी गुरुवार, दि. २९ ऑक्टोबर रोजी मलप्रभा हायस्कूल, चापगाव येथे चित्रकला व हस्तकला स्पर्धेचे आयोजन करण्यात आले आहे. विद्यार्थ्यांमधील सर्जनशीलता, कलात्मकता आणि कल्पकतेला प्रोत्साहन देणे हा या उपक्रमाचा उद्देश आहे.

या स्पर्धेमुळे विद्यार्थ्यांना आपल्या कलागुणांचे प्रदर्शन करण्याची संधी मिळणार असून, शालेय शिक्षणासोबतच कला व कौशल्य विकासालाही चालना मिळणार आहे.

खानापूर लाईव्ह | चापगाव