कारगील, जम्मू-काश्मीर आणि लडाख सारख्या दुर्गम सीमांवर बजावली कर्तव्य सेवा; आमदार विठ्ठलराव हलगेकर आणि मान्यवरांच्या उपस्थितीत देशभक्तीच्या अभूतपूर्व वातावरणात सोहळा.
खानापूर (विशेष प्रतिनिधी):
भारतीय सैन्यदलामध्ये सलग २४ वर्षे आपल्या प्राणांची बाजी लावून, देदीप्यमान आणि खडतर सेवा पूर्ण करून सेवानिवृत्त झालेले मौजे गोदगेरी (ता. खानापूर) येथील सुपुत्र हवालदार महेश हणमंत पाटील यांचा भव्य नागरी सत्कार व सेवानिवृत्ती सोहळा नुकताच गोदगेरी येथील पाटील गल्ली येथे अत्यंत दिमाखात आणि अभूतपूर्व उत्साहात पार पडला. देशाच्या सीमा सुरक्षित ठेवणार्या एका वीर जवानाचे कौतुक करण्यासाठी संपूर्ण गोदगेरी गावासह परिसरातील हजारो देशप्रेमी नागरिकांनी या सोहळ्याला हजेरी लावली होती.
या ऐतिहासिक सोहळ्याप्रसंगी खानापूर मतदारसंघाचे लोकप्रिय आमदार श्री. विठ्ठलराव हलगेकर यांनी प्रमुख उपस्थिती लावून हवालदार महेश पाटील आणि त्यांच्या परिवाराचा यथोचित सन्मान केला.
कारगील आणि जम्मू-काश्मीरच्या सीमांवर खडतर सेवा
हवालदार महेश पाटील यांनी आपल्या २४ वर्षांच्या प्रदीर्घ सेवाकाळात देशातील अत्यंत दुर्गम, संवेदनशील आणि कठीण समजल्या जाणाऱ्या सीमांवर कर्तव्य बजावले. त्यांनी जम्मू-काश्मीरमधील दहशतवादविरोधी कारवाया, कारगील मधील उणे तापमान असणारे बर्फाच्छादित डोंगर आणि लडाखच्या सरहद्दीवर अहोरात्र पहारा देऊन भारत मातेचे रक्षण केले. आपल्या कर्तव्यात दाखवलेले शौर्य आणि शिस्तीच्या जोरावर त्यांनी हवालदार पदापर्यंत झेप घेतली. त्यांच्या या शौर्यपूर्ण प्रवासाची माहिती जेव्हा व्यासपीठावरून सांगण्यात आली, तेव्हा उपस्थित संपूर्ण जनसमुदाय भारावून गेला होता.
सैनिकांचे योगदान अमूल्य : आमदार विठ्ठलराव हलगेकर
उपस्थितांना मार्गदर्शन करताना आमदार विठ्ठलराव हलगेकर भावूक झाले. ते म्हणाले, “आज आपण आपल्या घरांमध्ये सुरक्षित आणि शांततेत झोपू शकतो, कारण महेश पाटील यांच्यासारखे देशाचे वीर सुपुत्र सीमेवर उणे ३० अंश तापमान आणि कडक उन्हाची पर्वा न करता अहोरात्र पहारा देत असतात. २४ वर्षे मातृभूमीचे रक्षण करून सुखरूप गावी परतलेल्या जवानाचा सत्कार करणे हे संपूर्ण समाजाचे आद्य कर्तव्य आहे. हवालदार महेश पाटील यांचा हा सन्मान म्हणजे त्यांच्या त्यागाचा, शौर्याचा आणि देशसेवेचा गौरव आहे.”
भारत माता पूजन आणि देशभक्तीचा जयघोष
कार्यक्रमाची सुरुवात अत्यंत मंगलमय आणि राष्ट्रभक्तीने प्रेरित अशा वातावरणात झाली. सर्वप्रथम मान्यवरांच्या हस्ते ‘भारत माता’ आणि छत्रपती शिवाजी महाराज यांच्या प्रतिमेचे पूजन करण्यात आले. यानंतर संपूर्ण परिसर ‘भारत माता की जय’, ‘वंदे मातरम्’ आणि ‘हवालदार महेश पाटील तुम आगे बढो, हम तुम्हारे साथ है’ अशा गगनभेदी घोषणांनी दुमदुमून गेला था. स्थानिक वारकरी संप्रदायाने भजनांचा गजर करत आणि टाळ-मृदंगाच्या तालावर या सोहळ्याला एक वेगळीच पारमार्थिक आणि भक्तीमय उंची मिळवून दिली. गावकऱ्यांनी महेश पाटील यांची गावातून भव्य मिरवणूक काढत त्यांच्यावर गुलालाची उधळण केली.
मान्यवरांची मांदियाळी
या सोहळ्याचे अध्यक्षस्थान लाभलेले श्री. गंगाप्पा परशराम पाटील (अध्यक्ष, श्री बिह्वादेवी देवस्थान कमिटी, गोदगेरी) यांनी आपल्या अध्यक्षीय भाषणात महेश पाटील यांच्या बालपणापासूनच्या प्रवासावर प्रकाश टाकला आणि गावाचे नाव उज्ज्वल केल्याबद्दल त्यांचे आभार मानले. कार्यक्रमाचे दीपप्रज्वलन व उद्घाटन आमदार श्री. विठ्ठलराव हलगेकर आणि कर्नाटक राज्य कार्यकारिणी सदस्य श्री. प्रमोद कोचेरी यांच्या हस्ते करण्यात आले.
या सोहळ्याला राजकीय, सामाजिक आणि सहकार क्षेत्रातील अनेक दिग्गज नेते उपस्थित होते, ज्यामध्ये प्रामुख्याने:
सौ. धनश्री सरदेसाई (बेळगाव जिल्हा भाजपा प्रधान कार्यदर्शी)
श्री. मल्लाप्पा मारीहाळ (भाजप प्रधान कार्यदर्शी, खानापूर)
श्री. भरमाणी प्रकाश पाटील (खानापूर विकास आघाडी तथा मनमंदीर सोसायटीचे चेअरमन)
श्री. राजू सिद्धानी (गर्लगुंजी P.K.P.S. चेअरमन)
श्री. नारायण पाटील / नारायण गुरव (माजी उपाध्यक्ष व ग्रामपंचायत सदस्य, करंबळ)
तसेच गावातील आणि परिसरातील प्रतिष्ठित नागरिक सर्वश्री जोतिबा सुतार, शिवराम बेळगावकर, निकल पाटील, संदीप खोनेकर, यल्लाप्पा गांडीगावाड, विठ्ठल बेळगावकर आणि हणमंत पाटील यांनीही उपस्थित राहून जवानाला शुभेच्छा दिल्या.
तरुणांना सैन्य भरतीसाठी मार्गदर्शन करणार: हवालदार महेश पाटील
हा सोहळा यशस्वी करण्यासाठी श्री. हणमंत गंगाप्पा पाटील, श्री. रामदास हणमंत पाटील, श्री. दर्शन हणमंत पाटील यांच्यासह संपूर्ण पाटील कुटुंबीयांनी अतोनात परिश्रम घेतले. संपूर्ण गोदगेरी गाव, मित्रमंडळी आणि स्थानिक भाजप कार्यकर्त्यांनी केलेल्या या अभूतपूर्व स्वागताबद्दल हवालदार महेश पाटील यांनी अत्यंत भावूक होऊन सर्वांचे आभार मानले. सत्काराला उत्तर देताना ते म्हणाले, “भारतीय लष्करात सेवा करण्याची संधी मिळणे हे माझे भाग्य आहे. आता निवृत्तीनंतर मी गावातील आणि तालुक्यातील गरीब व गरजू तरुणांना सैन्यदलात भरती होण्यासाठी विनामूल्य मार्गदर्शन आणि ट्रेनिंग देणार आहे, जेणेकरून आपल्या भागातून अजून अनेक वीर जवान देशाच्या सेवेसाठी तयार होतील.” त्यांच्या या संकल्पामुळे गावकऱ्यांनी टाळ्यांच्या कडकडाटात त्यांचे कौतुक केले.
‘
