प्रामाणिकपणा, माणुसकी आणि समाजसेवेचा आदर्श ठरलेले पांडुरंग शांताराम हेब्बाळकर यांना भावपूर्ण अभिवादन
खानापूर : प्रतिनिधी
तिओली गावचे सुपुत्र, प्रामाणिक, मनमिळावू आणि समाजाभिमुख व्यक्तिमत्त्व म्हणून ओळख असलेले कै. पांडुरंग शांताराम हेब्बाळकर यांच्या प्रथम स्मृतिदिनानिमित्त त्यांच्या कार्याचा व जीवनप्रवासाचा भावपूर्ण स्मरण सोहळा होत आहे.
४ जुलै २०२६ रोजी त्यांच्या प्रथम स्मृतिदिनानिमित्त कुटुंबीय, नातेवाईक, मित्रपरिवार आणि ग्रामस्थ त्यांच्या आठवणींना उजाळा देत श्रद्धांजली अर्पण करीत आहेत.
१० मार्च १९७० रोजी तिओली येथील सर्वसामान्य शेतकरी कुटुंबात जन्मलेल्या पांडुरंग हेब्बाळकर यांनी कष्ट, प्रामाणिकपणा आणि सेवाभावाच्या जोरावर जीवनात वेगळी ओळख निर्माण केली. प्राथमिक शिक्षण गावात पूर्ण करून त्यांनी बेळगाव येथे पदवीपर्यंत शिक्षण घेतले. त्यानंतर काही काळ चित्रदुर्ग येथे वैज्ञानिक क्षेत्रात कार्य करून पुन्हा आपल्या गावात परतत शेती, दुग्ध व्यवसाय आणि समाजसेवेत स्वतःला वाहून घेतले.
दुग्ध व्यवसायातून त्यांनी अनेकांशी जिव्हाळ्याचे संबंध निर्माण केले. गरजू व आर्थिकदृष्ट्या दुर्बल कुटुंबांना वेळोवेळी मदतीचा हात देत त्यांनी माणुसकी जपली. २००३ मध्ये एलआयसी एजंट म्हणून कार्य सुरू करून आपल्या प्रामाणिक आणि विश्वासार्ह सेवेमुळे त्यांनी ग्राहकांचा विश्वास संपादन केला. २००६ पासून शाखाविकास एजंट म्हणून उल्लेखनीय कामगिरी करत त्यांनी तीन वेळा MDRT हा प्रतिष्ठेचा मान मिळवला.
समाजकार्याची आवड जपत २००७ मध्ये तिओली ग्रामदेवता लक्ष्मी यात्रेचे सचिव म्हणून त्यांनी जबाबदारी यशस्वीपणे पार पाडली. समाजात कोणालाही न दुखावता प्रेमाने वागणे, विश्वास जपणे आणि प्रत्येकाला आपलेसे करणे हा त्यांचा स्वभाव सर्वांच्या मनात आजही जिवंत आहे.
कुटुंबवत्सल आणि कर्तव्यदक्ष व्यक्तिमत्त्व म्हणून त्यांनी आपल्या मुलांना उच्च शिक्षण देत संस्कारांची श्रीमंती दिली. त्यांच्या अकाली निधनाने केवळ हेब्बाळकर कुटुंबावरच नव्हे, तर संपूर्ण तिओली गावावर शोककळा पसरली.
प्रथम स्मृतिदिनानिमित्त त्यांचे बंधू महेश गो. हेब्बाळकर यांनी व्यक्त केलेल्या भावना अंतःकरण हेलावून टाकणाऱ्या आहेत. “तुम्ही दिलेली शिकवण, संस्कार आणि माणुसकीचा वारसा आम्ही आयुष्यभर जपू. तुमच्या आठवणी आमच्यासाठी सदैव प्रेरणादायी राहतील,” अशा शब्दांत त्यांनी भावपूर्ण श्रद्धांजली अर्पण केली.
प्रामाणिकपणा, कष्ट, सेवाभाव आणि माणुसकीचा वारसा जपणारे कै. पांडुरंग शांताराम हेब्बाळकर यांचे कार्य व स्मृती तिओली गावासाठी कायम प्रेरणादायी राहतील.
