पहिला पगार विद्यार्थिनींच्या आरोग्यासाठी समर्पित; प्रा. कपिल गुरव यांचा प्रेरणादायी उपक्रम
खानापूर : आयुष्यातील पहिला पगार हा प्रत्येकासाठी आनंदाचा आणि अभिमानाचा क्षण असतो. मात्र, या आनंदाला सामाजिक बांधिलकीची जोड देत खानापूर येथील मराठा मंडळ कला व वाणिज्य पदवी महाविद्यालयाचे प्राध्यापक प्रा. कपिल गुरव यांनी आपल्या पहिल्या पगारातून ताराराणी महाविद्यालयातील विद्यार्थिनींसाठी सॅनिटरी नॅपकिन डिस्पोजल मशीन (Incinerator) भेट दिली. त्यांच्या या संवेदनशील आणि प्रेरणादायी उपक्रमाचे महाविद्यालयीन स्तरावर कौतुक होत आहे.
संघर्ष आणि प्रदीर्घ प्रतीक्षेनंतर प्रा. गुरव यांचा शासकीय नियम व प्रक्रियेनुसार पदवी महाविद्यालयाचा पगार अलीकडेच सुरू झाला. आर्थिक अडचणींच्या काळातही त्यांनी शिक्षणदानाचे कार्य सुरू ठेवले. अखेर पहिला पगार हातात आल्यानंतर स्वतःच्या गरजांपेक्षा विद्यार्थिनींच्या आरोग्याला प्राधान्य देत त्यांनी ही सामाजिक देणगी देण्याचा निर्णय घेतला.
महाविद्यालयीन विद्यार्थिनींच्या आरोग्य व स्वच्छतेच्या दृष्टीने मासिक पाळीच्या काळात सॅनिटरी पॅडचा योग्य वापर आणि सुरक्षित विल्हेवाट लावणे अत्यंत महत्त्वाचे आहे. वापरलेल्या पॅडची अयोग्य विल्हेवाट लावल्यास दुर्गंधी, अस्वच्छता आणि पर्यावरणीय समस्या निर्माण होऊ शकतात. अशा परिस्थितीत डिस्पोजल मशीनची सुविधा विद्यार्थिनींना स्वच्छ, सुरक्षित आणि सन्मानजनक वातावरण उपलब्ध करून देण्यास उपयुक्त ठरते.
या उपक्रमामागे केवळ देणगीची भावना नसून, आरोग्यविषयक जनजागृती आणि सामाजिक जबाबदारीचा संदेशही आहे. शैक्षणिक संस्थांमध्ये स्वच्छता, आरोग्य आणि पर्यावरण संवर्धन यांना प्राधान्य मिळावे, तसेच विद्यार्थिनींनी कोणताही संकोच न बाळगता आपल्या आरोग्याची काळजी घ्यावी, हा उद्देश या उपक्रमातून अधोरेखित झाला.
यावेळी महाविद्यालयाचे प्राचार्य श्री. अरविंद पाटील यांनी प्रा. कपिल गुरव यांच्या सामाजिक जाणिवांचे कौतुक केले. शिक्षक हा केवळ पुस्तकी ज्ञान देणारा नसून समाजाचा शिल्पकार असतो. प्रा. गुरव यांनी पहिल्याच पगारातून दाखविलेली सामाजिक बांधिलकी महाविद्यालयासाठी आणि समाजासाठी अभिमानास्पद असल्याचे त्यांनी सांगितले.
प्रा. गुरव यांचा हा उपक्रम इतर शिक्षक, प्राध्यापक आणि सुशिक्षित तरुणांसाठी प्रेरणादायी ठरणारा आहे. आपल्या कमाईतील काही भाग समाजहितासाठी देण्याची भावना प्रत्येकाने जोपासावी, असा संदेश या कृतीतून मिळतो. या प्रसंगी महाविद्यालयातील प्राध्यापक, कर्मचारीवर्ग आणि विद्यार्थिनी उपस्थित होत्या.
